ހިންގުމުގެ ދާއިރާގެ އިސްމުވައްޒަފުންގެ ހުނަރާއި ޤާބިލުކަން އިތުރުކުރުމުގެ ޕްރޮގްރާމް 2021-2023 ގެ ފުރަތަމަ ސެޝަން މިއަދު ބާއްވައިފިއެވެ. އެމް.އެން.ޔޫ ގެ މެއިން އޮޑިޓޯރިއަމްގައި 2 ގަޑިއިރަށް ކުރިއަށް ގެންދެވުނު މި ސެޝަންގެ މައުޟޫ އަކީ: "ސްޓޭއިންގ ޕޮޒިޓިވް" އެވެ.

މި ސެޝަން ނަންގަވައިދެއްވާފައިވަނީ 40 އަހަރުވަންދެން ޕަބްލިކް ސަރވިސްގައި ޚިދުމަތް ކުރުމަށްފަހު ރިޓަޔަރ ކުރައްވާފައިވާ އަލްފާޟިލް އިބްރާހީމް ސަލީމްއެވެ. ސަލީމަކީ 1982 އިން 1987 އަށް ރާއްޖޭގެ ވައިސް ގަވަރނަރ ގެ މަޤާމު އަދާކުރައްވާފައިވާ ފަރާތެކެވެ. އަދި ބޯޑު މެންބަރެއްގެ ހައިސިއްޔަތުން، ދިރާޤު، މޯލްޑިވްސް ޓެލެކޮމިއުނިކޭޝަންސް ކުންފުނި، މޯލްޑިވްސް ނޭޝަނަލް ޝިޕިންގ ލިމިޓެޑް، މޯލްޑިވްސް ފައިނޭންސް ލީސިންގ ކޮމްޕެނީ އަދި ބޭންކް އޮފް މޯލްޑިވްސްގައި ގައި ވަނީ މަސައްކަތްކުރައްވާފައެވެ. މީގެ އިތުރުން އެމް.ޓީ.ޓީ.ސީ ގެ މެނޭޖިންގ ޑިރެކްޓަރ ގެ މަޤާމާއި އައިލެންޑް އޭވިއޭޝަން ސަރވިސަސް ލިމިޓެޑް ގެ ޗެއަރމަން ކަން އަދާކޮށްދެއްވާފައިވެއެވެ.

މިއަދުގެ ސެޝަންގައި މުއާޞަލާތުކުރުމުގައާއި ޓީމާއި އެކު ގުޅިގެން ލީޑަރެއްގެ ހައިސިއްޔަތުން މަސައްކަތްކޮށް ހިންގުމުގައި، ޕޮޒިޓިވްކޮށް ވިސްނުމުގެ މުހިއްމުކަމުގެ މައްޗަށް އަލިއަޅުވާލައި ޓްރެއިނަރުގެ އަމިއްލަ ތަޖުރިބާއިން ގިނަ މިސާލުތަކެއް ވަނީ ހިއްސާކޮށްފައެވެ. އަދި މީގެ އިތުރުން އެކިއެކި ކުންފުނިތަކުގެ އާއި ބައެއް ބޭފުޅުންގެ ޙިޔާލުފުޅާއި ތަޖުރިބާ ހިއްސާކޮށްފައިވެއެވެ. މ  ސެޝަންގައި ސަރުކާރުގެ އިދާރާތަކުގެ ހިންގުމުގެ ލެވެލްގައި މަސައްކަތްކުރާ 200 އަށް ވުރެ ގިނަ ފަރާތް ވަނީ ބައިވެރިވެވަޑައިގެންފައެވެ.

 27 ޑިސެންބަރު 2021 ގައި ރައީސުލްޖުމްހޫރިއްޔާ އިފްތިތާޙްކޮށްދެއްވި މި ޕްރޮގްރާމަކީ ރައީސުލްޖުމްހޫރިއްޔާގެ އޮފީހުގެ ޕަބްލިކް ސަރވިސް ޑިޥިޝަން އާއި ސިވިލް ސަރވިސް ޓްރެއިނިންގ އިންސްޓިޓިއުޓް ގުޅިގެން 2 އަހަރު ދުވަހުގެ މުއްދަތަށް ކުރިއަށް ގެންދިއުމަށް ރޭވިފައިވާ ޕްރޮގްރާމެކެވެ. މި ޕްރޮގްރާމްގެ ތެރެއިން ސަރުކާރުގެ އިދާރާތަކުގެ އިސްފަންތީގައި މަސައްކަތްކުރާ މުވައްޒަފުންގެ ހުނަރާއި ޤާބިލުކަން އިތުރުކޮށް، އިދާރާތަކުން ފޯރުކޮށްދޭ ޚިދުމަތުގެ ފެންވަރު މަތިކޮށް ހަރުދަނާކުރުމަށްޓަކައި މާސް ލެކްޗަރތަކާއި، ވަކި އޯޑިއަންސްތަކަށް ޚާއްސަކޮށްގެން ބޭއްވޭ ސެޝަންތައް ކުރިއަށް ގެންދެވޭނެއެވެ.