ހިންގުމުގެ ދާއިރާގެ އިސްމުވައްޒަފުންގެ ހުނަރާއި ޤާބިލުކަން އިތުރުކުރުމުގެ ޕްރޮގްރާމް 2021-2023 ގެ ފުރަތަމަ ސެޝަން މިއަދު ބާއްވައިފިއެވެ. އެމް.އެން.ޔޫ ގެ މެއިން އޮޑިޓޯރިއަމްގައި 2 ގަޑިއިރަށް ކުރިއަށް ގެންދެވުނު މި ސެޝަންގެ މައުޟޫ އަކީ: "ސްޓްރެޓެޖިކް ތިންކިންގ: ސެޓިންގ ނިއު ޓާގެޓްސް އެންޑް ގޯލްސް" އެވެ.

މި ސެޝަން ނަންގަވައިދެއްވާފައިވަނީ މައިންޑްފީލްޑް ގެ ކޯ ފައުންޑަރ އަދި ކޯޕަރޭޓް ޓްރެއިނަރ އަލްފާޟިލް މުޙައްމަދު މިސްތޯޙު އެވެ. މިސްތޯހު އަކީ ޔުނިވަރސިޓީ އޮފް ވެސްޓަރން އޮސްޓްރޭލިއަރ އިން މާސްޓަރސް އިން ބިޒްނަސް އެޑްމިނިސްޓްރޭޝަން ހާޞިލުކުރައްވައި، ކޮންސަލްޓެންސީގެ ޚިދުމަތާއި އެކި ދާއިރާތަކުގެ މީހުން ތަމްރީނުކުރުމުގައި ގިނަ އަހަރުތަކެއް ވަނީ ހޭދަކުރައްވާފައިވާ ފަރާތެކެވެ.

މިއަދުގެ ސެޝަންގައި ކަނޑައެޅިފައިވާ ލަނޑުދަނޑިތަކަށް ވާސިލުވުމަށްޓަކައި ވިސްނުން ބައްޓަންކުރަންވީ ގޮތުގެ މައްޗަށް އަލިއަޅުވާލައި ޓްރެއިނަރުގެ އަމިއްލަ ތަޖުރިބާއިން ގިނަ މިސާލުތަކެއް ވަނީ ހިއްސާކޮށްފައެވެ. ސަރުކާރުގެ އިދާރާތަކުގެ ހިންގުމުގެ ލެވެލްގައި މަސައްކަތްކުރާ 200 އަށް ވުރެ ގިނަ ފަރާތް ވަނީ މިއަދުގެ ސެޝަންގައި ބައިވެރިވެވަޑައިގެންފައެވެ.

27 ޑިސެންބަރު 2021 ގައި ރައީސުލްޖުމްހޫރިއްޔާ ފައްޓަވައިދެއްވި މި ޕްރޮގްރާމަކީ ރައީސުލްޖުމްހޫރިއްޔާގެ އޮފީހުގެ ޕަބްލިކް ސަރވިސް ޑިޥިޝަން އާއި ސިވިލް ސަރވިސް ޓްރެއިނިންގ އިންސްޓިޓިއުޓް ގުޅިގެން 2 އަހަރު ދުވަހުގެ މުއްދަތަށް ކުރިއަށް ގެންދިއުމަށް ރޭވިފައިވާ ޕްރޮގްރާމެކެވެ. މި ޕްރޮގްރާމްގެ ތެރެއިން ސަރުކާރުގެ އިދާރާތަކުގެ އިސްފަންތީގައި މަސައްކަތްކުރާ މުވައްޒަފުންގެ ހުނަރާއި ޤާބިލުކަން އިތުރުކޮށް، އިދާރާތަކުން ފޯރުކޮށްދޭ ޚިދުމަތުގެ ފެންވަރު މަތިކޮށް ހަރުދަނާކުރުމަށްޓަކައި މާސް ލެކްޗަރތަކާއި، ވަކި އޯޑިއަންސްތަކަށް ޚާއްސަކޮށްގެން ބޭއްވޭ ސެޝަންތައް ކުރިއަށް ގެންދެވޭނެއެވެ.